आस्था साँस्कृतिक साँझ २०७०
नमस्कार,
“आदर्श समाज र प्रगतिशील संस्कृति निर्माणमा समर्पित” यस आस्था सांस्कृतिक परिवारले विगत १० वर्षदेखि निरन्तर गर्दै आएको आस्था सांस्कृतिक साँझको १०औं श्रृंखला आगामी माघ १७ र १८ गते अरनिको सभाभवनमा हुने जानकारी गराउन पाउँदा हामी ज्यादै हर्षित छौं ।
कला र संस्कृतिलाई समाजका केही सीमित वर्गले केवल मनोरञ्जन र अश्लीलताको अर्थमा बुझिरहेको परिवेशमा आस्था सांस्कृतिक परिवारले आफ्नो स्थापनाकालदेखि नै प्रगतिशील कला र साहित्यकै माध्यमबाट नेपाली समाजमा देखापरेका सामाजिक, राजनीतिक, साँस्कृतिक विकृति–विसंगति, आर्थिक असमानता, वर्गभेद, अन्धविश्वासविरुद्ध लडिरहेको छ । प्रगतिशील कला, साहित्य र संस्कृतिले मात्र साँचो अर्थमा देश, जनता र समाजको सेवा गर्न सक्छ भन्ने कुरामा हामी विश्वास राख्दछौं ।
नेपाली समाज आफै कला र संस्कृतिमा धनी छ । त्यसकारण ‘जनताबाट सिक र जनतालाई देऊ ।’ भन्ने उक्तिलाई आत्मसात गर्दै आस्थाले सदैव नेपाली समाजका लोक कला र संस्कृतिकै माध्यमबाट जनताहरुलाई सचेत बनाई सभ्य एवं सुसंस्कृत समाज निर्माण गर्ने अभिभारा बोक्दै आएको छ ।
भक्तपुरकै परिवेशमा पनि गाईजात्रा, तीज, दशैं, तिहारजस्ता पर्वहरुको अवसरलाई उपयोग गरी विभिन्न गीत, नृत्य, नाटकको माध्यमबाट विकृतिहरुलाई उदांग्याउने र जनताहरुलाई सचेत बनाउने काम गर्दै आएको कुरा सर्वविदित्तै छ ।
देशमा विदेशी शक्ति केन्द्रहरुको हस्तक्षेप बढ्दो छ । विभिन्न असमान सन्धि सम्झौता गरी नेपालका स्रोत, साधनमा कब्जा जमाउन खोजिरहेको भारतीय विस्तारवादले पछिल्लो समय नेपालको सांस्कृतिक क्षेत्रमा पनि अतिक्रमण गर्न थालेको छ । भानुभक्त र देवकोटा जस्ता नेपाली साहित्यकारहरुको जन्मजयन्तीहरु समेत भारतीय पुस्तकालयहरुमा आयोजना गरिनु, केवुल नेटवर्कहरुमा भारतीय च्यानलहरुको प्रभुत्व हुनु नेपालका सांस्कृतिक क्षेत्रमा गरिएका अतिक्रमणका केही उदाहरणहरु हुन् । स्वतन्त्र र सार्वभौम देशमाथि भइरहेका यी र यस्ता अतिक्रमण तथा हस्तक्षेपहरुको विरुद्ध आस्था सदैव संघर्षरत छ ।
आस्था सांस्कृतिक साँझको १० औं श्रृंखला पनि वैदेशिक हस्तक्षेपविरुद्धको जनचेतना अभियानको एउटा कोसेढुंगा हुने कुरा जानकारी गराउन पाउँदा हामी गौरवको महसुस गरिरहेका छौं । हाम्रो यो अभियानलाई भविष्यमा पनि निरन्तर अगाडि बढाउन यहाँहरु सबैको न्यानो माया र सहयोगको अपेक्षा गर्दछौं ।
धन्यवाद ।
सृजना सैंजू
अध्यक्ष
२०७० पुस १४ गते, आइतबार
.JPG)
